Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

EUSKADI.-EHUko Uda Ikastaroetan gaur: Hizkuntza jarrerak irakatsi behar zaizkie hizkuntza nagusia darabilten hiztunei


2006-08-29 14:27

DONOSTIA, 29 (EUROPA PRESS)

Hizkuntza jarrerak nola landu irakaskuntzan izenburupean Bernat Joan I Mari, ERCko eurodiputatu eta soziolinguista kataluniarrak, XXV. EHUko Uda Ikastaroek antolatutako Gazteak Euskaraz Hizketan: Ahozkotasuna eta Jarreren Lanketa ikastaroan parte hartu du gaur eta laburpen gisa hizkuntza jarrerak irakatsi behar zaizkie hizkuntza nagusia darabilten hiztunei erran du.

Hizkuntza nagusien eta gutxituenen arteko erdibidea, bertutea, non dagoen zehaztea zaila izaten da. Normalizazio linguistikoaren bide malkartsuetan okerbideratzea normala izateaz gain, gizarte presioaren eraginek hizkuntza batekiko jarrerak finkatzen ditu. Gogoratu, bestela, Artzeren esanak: Hizkuntza bat ez da galtzen ez dakitenek ikasten ez dutelako, dakitenek hitz egiten ez dutelako baizik.

Pavlov-en txakurraren antzera, Joan I Mari irakaslearen esanetan, hizkuntza batekiko estimulu negatiboak jasotzeak hizkuntza bat gogoko ez dugula esatera garamatza. Nagusitasun linguistikoak hainbat gizarte patologia sortzen ditu eta horien artean dominazioarena. Gizarte presioak, estimulu negatiboak eta gizarte onespenak agintearekiko obedientziaren markak dira. Eta hizkuntza kontuetan horrelako egoerak nonahi topa ditzakegu.

Hizkuntza aktitudeak garatzea komunitate linguistikoaren bizitza bermatzen du. Hizkuntza, euskara, instrumentu baten moduan soilik ikusteak -gurasoek dioten bezala: nire semeak lana eduki dezan euskaraz ikastea nahi dut- ez du hizkuntza harekiko leialtasuna bermatzen. Soziolinguista honek dioen moduan normaltasun linguistikoa eta hizkuntza leialtasuna gauza bera dira: hizkuntza eskubideekin batera, hiztunak hizkuntza horretan esan nahi duena esaten jakin behar du. Hori da normaltasuna.

Hizkuntza leialtasunarena jarrera kontua omen da, Joan I Mari irakaslearen esanetan. Bere baitan hizkuntza bat baino gehiago dituzten komunitateek leialtasun kontuetan erdibidea non dagoen topatzen zailtasun handiak izaten dituzte. Gutxiegikeriak edo gehiegikeriak menderatzaile eta menperatu egoerak sortzen baititu. Gehiegikeriak presio soziala eragiten du eta presio sozialak estimulu negatiboak sortzen ditu.

GAZTELERA ERABILGARRIAGOA

Garrantzitsuagoa, erabilgarriagoa edo kultuagoa omen da gaztelera. Joan I Mari irakaslearen aburuz, iritzi nagusituak besterik ez diren hitz hauek bestelako aktitudeak dakartzate, larderia eta elkarrizketarako gogo eza, adibidez. Jarrera honek, era berean, beste hizkuntzekiko, eta hizkuntza honen emaitza kulturalekiko eta hiztunekiko, mesprezua eragiten du.

Hizkuntza jarrerak irakatsi behar zaizkie hizkuntza nagusia darabilten hiztunei. Hizkuntza aktitudeak garatzea hainbat gauzetarako onuragarria izango da, errespetuan oinarritutako hezkuntza da hau: errealitatea poliedrikoa baita.

Segurtasun eza eta mesfidantza dira, berriz, hizkuntza gutxituen soziologia bat egiterako orduan paradoxikoki topa ditzakegun hitzik sendoenak. Lotsatzetik ukapenera dagoen bidea oso motza izaten da. Hiztun gutxituak, denboraren poderioz jasotako estimulu negatiboak direla eta, hizkuntza horretan hitz egiteko beldurrak sor ditzake, eta azken unean autoukapena bera.

Beraien komunitate linguistikoa ukatzera iristen direnak normalizazio linguistikoaren aurkari nagusienak izaten dira. Era berean, jarrera ukatzaile honek hizkuntza gutxitua gutxiagotzen du hiztunengan.


224 aldiz ikusita
+ Berria gehitu   + Berria aldatu/ezabatu

Iruzkina bidali

Testua:
Erabiltzailea: Anonimoa
Erabiltzaile erregistratua Lehenengo izena eman bestela anonimoa izango zara
Lege oharra onartzen dut
0 iruzkin aurkitu dira 1tik 0ra erakusten

0 iruzkin