Webgune honek cookieak erabiltzen ditu, gure cookien politika ikusteko, Nabigatzen jarraitzen baduzu onartuko duzu
EU | ES
Menu
Logo kaixo.com Logo kaixo.com
Logo bilatu
Logo usuario

"Itzal marra", Ibon Aranberriren interbentzioa


Ibon Aranberrik, Museo Bikoitza proiektuaren lehen edizioan aritu den artistak, bere lanaren emaitza aurkeztu du San Telmo Museoan: Itzal marra. Obra gaurtik, ekainak 11, aurrera egongo da ikusgai museoan.


Lehen edizio honetarako, Ibon Aranberrik interbentzio bikoitz bat sortu du, museoko funts lekualdatuetatik sortutako material eta estratuez osatua. Itzal marra izenburupean, batetik, biltegiratze-sistema gisa eskuz egindako egitura bat berreraikitzen du, eta, bestetik, aurkitutako gainazaletako idazkunen gainean sortutako kalkoen bilduma oso bat aurkezten du. Bat museoko klaustroan egongo da eta bestea oroitarrien biltegian (elizako atrioaren ondoan).


Honela azaltzen du artistak bere lana:


“Museo bilakatu zenean, zerbitzu publikora egokitutako azpiegitura funtzional bihurtu zen komentu zaharra. Industrializaziotik sortutako proiektua izanik, aldaketa-prozesuan dauden bizimoduen materialak eta aztarnak gordetzeko zereginari ekin zion, gizarte modernoaren premiei erantzungo zien kultura-kontakizun bat antolatzeko eginkizunean.


Denborak aurrera, zenbait berrikuspen izan ditu bildumak, inbentario kontsultagarri eta didaktiko baten kondizioa bere egiteraino. Horrela, desmaterializaziorantz jo du du museoak, eta, horrenbestez, identifikazioa ez dago jada nahitaez lotuta erregistro fisikoa ukitzearekin, baizik eta erregistroaren arrastoan sartzearekin. Desplazamendu horrek barruko arkitektura hustea ahalbidetu du, erabilera berrien arabera egokituta.


Horrekin batera, biltegiratzeko ohiko guneak deslokalizatu egin dira. Museoaren beraren kanpoaldea osatzen dute gaur egun gordailu horiek. Bertan metatutako materialen zati handi bat aurreko erabilera eta egoeretatik dator. Departamentu bera partekatzen dutenez, kategoria klasikoen arteko muga diferentzialak —hala nola ondarea, bilduma eta kultura materiala— lausotu egiten dira azkenean.


Erreformek ondare-soberakin propioa sortu zuten, zegokion esparrua berritzean edo aldatzean. Azaleratu ziren objektuetako batzuk eraikinaren beraren osagaietatik datoz. Lurpean urgentziaz egindako indusketek pieza gehiago ekarri zituzten. Aztarna horiek metatu egin ziren, antzeko beste aztarna batzuk erakarriz. Azken metaketak museoaren fase historikoak zeharkatzen ditu eta museoaren beraren nortasun ezaugarrietako bat da.


Hilobi-harriak ugariak dira materialen artean, eta biltegien zati handi bat jaten dute. Museoaren beraren iraganetik eta inguruko elizetako lurperatzeetatik datoz gehienbat. Higatutako harearrizko lauzen gainean errepikatzen dira aurreko mendeetako merkatarien familia abizenak, hiriaren legatuen gordetegi gisa museora ekarritakoak, lurperatze moduek izan zuten bilakaeraren ondorioz.


Beren orientazio horizontala atxiki zuten hasiera batean erakutsitako hilarriek, lurzorutik zerbait bereizita, jatorrizko posizioa adieraziz. Museo politika erkideen ondorioz, politika horiek zirkulazioaren aurretik behaketa lehenesten dutela eta pertzepzio bisuala bultzatzen dutela kontuan izanda, goratu egin dituzte hilarri horiek posizio bertikalera iristeraino, espazioa liberatuz eta aurretiko hurbilketa bat proposatuz. Hiru dimentsioko jatorrizko gorputza azalera lauan murrizten da azkenean.


Metalezko egitura modular bat, iraganean neurrira prestatutako hilarrien meta-leku gisa. Sistema zentralizatu baten eredua, biltegia museoaren beste ingurune batzuekin batera uztartzen zen garaikoa, zerbitzuak kanporatu aurrekoa. Berreskuratu eta handitu egin da egitura, desmuntatzearen markak atxikita inoiz ere gertatu ez zen etorkizuneko berreraikitze baterako jarraibide gisa. Forma bere horretan aurkezten da orain, erakusketa gunera eramana.


Bestalde, museoaren biltegi bisitagarri berrian jarritako hilarriei zenbait kalkatze-teknika ezarri zaizkie, askotariko irudiak sortuz, eta dagokien irudikapenaren pean ezkutatuta geratzen direlarik. Paperak estalitako azalerak biltzen dituzten inskripzioak markatzen eta agerian uzten dituzte kalkoek, irudia lausotzearekin batera. Atlas-ariketa osoa gauzatzeko, biltegi osagarrietan bereizita dauden unitate eta zatikien kalkoak gehitu dira. Hilarrien gaineko kalkoak ere egin dira, zeinak, beren jatorria museoaren zorupean izanik, beste eskuduntza erakundeek zaindu baitzituzten, arkeologia gisa sailkatu zirenez.”


 


Museo Bikoitza


2018an aurkeztu zuen museoak Museo Bikoitza proiektua, jarraitutasuna ematen diona  Asier Mendizabalek 2014an San Telmon erakutsi zuen lanari –Soft Focus–.


Museoan egingo den aldizkako esku-hartzeen programa bat da, urtero gonbidatutako artista batek egingo duena (proiektua abiatzeko Asier Mendizabalek Ibon Aranberri hautatu zuen), eta museoarekin lotuta lan egingo du artista horrek proiektu berri baten produkzioan. Helburua da bildumaren eta kontakizun museografikoaren hainbat berrirakurketa ahalbidetzea, artista ezberdinen eskutik.


Lan horren emaitza erakusketa-programaren barruan egongo da eta, ondoren, museoaren arte-bildumari gehituko zaio, egungo une bakoitza San Telmoko bildumaren ondarera eta kontakizunera gehitzeko premia adieraziz, premia hori ordeztu gabe, betiere.


Proiektu bakoitza egiten duen artistak hurrengo proiektuaren aukeraketan, gonbidapenean eta jarraipenean parte hartzen du. Horrela, epe luzera, programaren metatutako emaitza ez da pertsona bakar baten irizpide partikularrera lotuta egongo, eta, aitzitik, museoarekin konprometitutako kolektibitate baten bidez sortuko da, museoan bertan parte hartzearen bidez.


Artistek edukiko dituzten lan esparru posibleak San Telmoren bilduma, museografia, eta testuingurua eta historia dira.


 


Ibon Aranberri


Ibon Aranberrik diseinua eta eskultura ikasi zituen EHUn eta Milanoko eskola politeknikoan. Artelekuko tailerretan aritu ondoren New York eta Japoniako zentru ezberdinetan osatu zuen formakuntza. Harrezkero ibilbide oparoa garatu du. Tarteka irakasle lanetan aritzen da eta zenbait idatzizko hedabiderekin kolaboratu izan du. Vienako Secession, Bartzelonako Fundació Antoni Tapies, Madrileko Museo Reina Sofía, Kunsthalle Basel edota Frankfurter Kunstvereinen izanak ditu bakarkako erakusketak. Talde erakusketen artean honakoak nabarmendu ditzakegu: Región, Fundación Cerezales, Leon, 2018; Histories of a Global Hub, Suzhou Art Museum, Txina, 2016; 16th Sydney Biennale; Documenta 12, Kassel; edota Manifesta 4, Frankfurt. Laster 10th Göteborg Biennialean hartuko du parte.


Hasiera data:2019-06-11
Bukaera data:2029-12-30

Helbidea: San Telmo Museoa, Donostia / San Sebastián

"Itzal marra", Ibon Aranberriren interbentzioa

Altitudea: 43.324954

Latitudea: -1.984927

Open data Euskadi

44 aldiz ikusita

2019ko ekainaren 12an 04:15etan

Erakusketak buruzko sarrerak Euskadiko agendan

+ Sarrera ezabatu / aldatu + Gehitu dohako sarrera agendan